HARAYA MANDARAYA MAPAGPARAYA




HARAYA MANDARAYA MAPAGPARAYA



Bagamat nahihimbing ka sa kabilang silid (baka nagtutulug-tulugan lamang?)
nagitla sa bira’t bigwas mula sa kung anong nabistay
sa kamalayang naidlip habang napamalik-mata sa TV
batbat ng balita tungkol sa giyera sa Iraq at Afghanistan
hulagway na sinala ng budhi (masalimuot pa sa tunay na karanasan)
hinalughog mula sa hukay ng utak hitik sa panaginip—
Doon ba ibinurol ang mapait na alaala
Bakit susunod sa teorya nina Freud at Lacan?

Samantalang sa tuhod nagsalabid ang gayuma ng salamisim hinugot
sa nabuking istratehiya ng sining-para-sa sining (palpak na hinuha)
Akala mo ba’y tiwalag ka sa kilabot ng mga pangyayari

Pinugutan ng ulo si Zoilo Francisco, taga-Gamay, Samar—
huwag kang magtiwala sa guhit hanggang wala ka sa langit

Anong hayup anong ahas ang gumapang mula sa puntod ng mithing nawaldas
bumibigkis sa leeg, sa balakang (nakadipa ka sa kabilang silid walang muwang)
napagulantang nang lumingon at pumihit, sumisilip ang ngiti—

Nalugmok sa kabulaanan—walang haplos o lambing ang imahen sa TV—
putok gulpi’t palo dagok sindak ng pagkilala
(Inaantabayanan ang kidlat mula sa bughaw na alapaap)

Anong hiwagang binudburan ng asin, limahid na libog ng bugaw na mangungulimbat
ang dapat matarok habang gumagala ang iyong ulirat sa pagkaidlip --

Naghihintay ka ba ng pagbabago? (marahan kang bumaba sa hagdan, walang paalam)
Bilanggong pinaso ang suso ginahasa Kinoryente ang bayag pinagbubugbog
Nagimbal. Labis na kabuktutan. Umilag sa tilamsik ng aninong lumisan.

Hagkan mo akong mahigpit, ulilang Anghel, yapusin ang hubad na gabing buto’t balat—
Papanaw ng walang ungol o gibik (sino ka, banyaga)

Talang pumaimbulog bituwing nalaglag nahulog mula sa arko ng iyong pilik-mata
Lilisan ng walang saklolo (sino ka, dayuhan)

Yapusin mo ang kaluluwang umusbong sa langib ng sugat
at sunggaban ang guniguning suwail (sino ka, kapiling)
duguan, lumuluhod sa naghihingalong katawan ng pagsasarili

--ni E. SAN JUAN, Jr..

Comments

Post a Comment

Popular posts from this blog

JOSE CORAZON DE JESUS--ANG SINING NI HUSENG BATUTE--E. SAN JUAN, Jr.

Image
PAGSUBOK SA ISANG  MAPAGPALAYANG  PAGKILALA'T   PAGTAYA  SA SINING  NI   JOSE CORAZON DE JESUS ni E. SAN JUAN, Jr. Kung kasadlakan man ng pula’t pag-ayop, / tubo ko’y dakila sa puhunang pagod….” --Francisco Baltazar, “Kay Selya” Only through the objectively unfolded richness of man’s essential being is the richness of subjective human sensibility either cultivated or brought into being…. The forming of the five senses is a labor of the entire history of the world down to the present. --Karl Marx, Economic and Philosophic Manuscripts of 1844 Dalawang bagay ang bumigo sa akin nang napakalaki: Ang paglipad ko sa Hongkong at ang paglagpak ko sa pulitika. --Jose Corazon de Jesus, “Talambuhay ng kanyang sarili”     Dahil sa masidhing pagkagumon ng marami sa komersyalisadong aliwan--telenobela, pelikulang tatak-Hollywood, malling, kulto nina Bieber at iba pang dayuhang selebriti sa awitan at isports---pambihira na ang bumabasa o may interes sa panulat ni  Jose Corazon de Jesus (Huseng
Read more

INTRODUKSIYON KAY EFREN ABUEG--E. San Juan, Jr.

Image
ULIRANG HALIMBAWA NI EFREN ABUEG: Tungo sa Mapagpalayang Sining ni E. San Juan, Jr. Kamakailan, bago ipinawalan ang “Morong 43” na biktima ng AFP/PNP terorismo, tinangkang bumisita sa kanila habang nakapiit sa Camp Bagong Diwa, Taguig, ang isang grupo ng makata at pintor. Nais ng Defend-ST, Artists Arresst, at Kilometer 64 na magdaos ng workshop para sa mga bilanggo. Bagamat may pahintulot sa BJMP-Capitol Region, hindi sila pinahintulutan ng jail warden. Ipinagbawalan. Mapanganib ang sining. Di lamang nakapupukaw, nakagagambala pa. Walang lusot ang mga dumaramay. Bukod sa marahas na strip search na bati ng mga guwardiya, kinumpiska ng mga awtoridad ang lahat ng babasahin. Kinunan ng litrato ang mga alagad ng sining, inimbestiga at pinagtatatanong. Itinuring ang mga dalaw na mga kriminal (ulat ni Ronalyn Olea, Bulatlat, 5 Oktubre 2010). Sinamsam ang ilang babasahin kritikal sa rehimeng Arroyo. Sindak at takot ang naghari. Sa malas, hindi ito nakagugulat. Noong bungad ng dekada 80
Read more

USAPING PANGWIKA--diskurso ni E. San Juan, Jr.

Image
INTERBENSIYON SA USAPIN NG PAMBANSANG WIKA  (Panayam sa Ateneo University, March 12, 2008, sa okasyon ng paglulunsad ng librong BALIKBAYANG SINTA: AN E. SAN JUAN READER)  “Ang hindi magmahal sa sariling wika ay……” –JOSE RIZAL by E. San Juan, Jr. 1. Sa kasalukuyang matinding sigalot sa bansa, anumang talakayan hinggil sa wika ay tiyak na magbubunsod sa isang away o maingay na pagtatalo. Kahawig nito ang usapin ng kababaihan.  Laging matinik ang isyu ng pambansang wika, isang sintomas ng pinaglikom na mga sakit ng body politic. Tila ito isang mitsang magpapasabog sa pinakabuod na mga kontradiksiyong bumubuo sa istruktura ng lipunang siyang nakatanghal na larangan ng digmaan ng mga uri at iba’t ibang sektor.  2. Lalong masahol siguro kung sabihin kong nasa panig ako ng mga nagsususog sa isang pambansang wikang tinaguriang “Filipino.”  Tiyak na tututol ang mga Sebuano, Ilokano, Ilonggo, mga alagad ng Taglish, o Ingles, o Filipino-Ingles.  Ngunit hindi ito maiiwasan,
Read more